మాదకద్రవ్య రహిత సమాజంగా మారుద్దాం
• నగరపాలక సంస్థ కమిషనర్ పి.విశ్వనాథ్
కర్నూలు నగరపాలక (అఖండ భూమి న్యూస్) :
మాదక ద్రవ్యాల రహిత సమాజ స్థాపనలో ప్రతి ఒక్కరూ భాగస్వాములు కావాలని నగరపాలక సంస్థ కమిషనర్ పి.విశ్వనాథ్ తెలిపారు. మంగళవారం నషా ముక్త్ భారత్ అభియాన్ కార్యక్రమం భాగంగా కొండారెడ్డి బురుజు వద్ద ఉద్యోగులు, సిబ్బందితో మాదకద్రవ్య రహిత సమాజ నిర్మాణం కోసం ప్రతిజ్ఞ చేయించారు.
ఈ సందర్భంగా కమిషనర్ మాట్లాడుతూ.. కేంద్ర సామాజిక న్యాయ సాధికారిత మంత్రిత్వ శాఖ ఆధ్వర్యంలో చేపట్టిన నషా ముక్త్ భారత్ అభియాన్ గొప్ప ప్రాజెక్టు అని తెలిపారు. మాదక ద్రవ్యాల వల్ల కలిగే నష్టాలపై ప్రజలకు, విద్యార్థులకు అవగాహన కల్పించడం, వ్యసనగ్రస్తులను గుర్తించి వారిని దాని నుండి విముక్తులను చేయడమే ఈ ప్రాజెక్టు ప్రధాన లక్ష్యమని కమిషనర్ తెలిపారు. యువత, విద్యార్థులు మత్తు పదార్థాలు, మాదక ద్రవ్యాలకు దూరంగా ఉండి దేశాన్ని ప్రగతి వైపు నడిపించాలని సూచించారు. మాదక ద్రవ్యాల దుష్పరిణామాలు, అక్రమ రవాణాను నిరోధించడం ప్రతి పౌరుడి బాధ్యతగా పేర్కొన్నారు. ఉద్యోగులు సైతం మాదకద్రవ్యాల వినియోగం వల్ల కలిగే అనర్థాలను ప్రజలకు తెలియజేసి ఆరోగ్య భారత్ కోసం కృషి చేయాలన్నారు.
కార్యక్రమంలో మేనేజర్ యన్.చిన్నరాముడు, ప్రజారోగ్య అధికారి డాక్టర్ నాగశివ ప్రసాద్, ఆర్‌ఓ జునైద్, కార్యదర్శి నాగరాజు, సూపరింటెండెంట్ సుబ్బన్న తదితరులు పాల్గొన్నారు.
