సీ ఈ సీ రాజీనామాకు 48 గంటల గడువు… కాక్రోచ్ జనతా పార్టీ

ఓటర్ల హక్కులకు భంగం కలిగిస్తున్నారనే ఆరోపణలపై దేశ ప్రధాన ఎన్నికల కమిషనర్ (సీఈసీ) జ్ఞానీష్ కుమార్ వెంటనే తన పదవికి రాజీనామా చేయాలని కాక్రోచ్ జనతా పార్టీ (సిజెపి) డిమాండ్ చేసింది. ఈ మేరకు ఆయనకు 48 గంటల గడువు విధిస్తూ సిజెపి వ్యవస్థాపకుడు అభిజీత్ దీప్తే గురువారం న్యూఢిల్లీలో జరిగిన విలేకరుల సమావేశంలో సంచలన హెచ్చరికలు జారీ చేశారు. సీఈసీ గనుక నిర్ణీత 48 గంటల్లోగా తన పదవి నుంచి తప్పుకోకపోతే, దేశవ్యాప్తంగా భారీ ఆందోళనలు చేపడతామని ఆయన స్పష్టం చేశారు. ఇందులో భాగంగానే రాజధాని నగరంలో ‘జంతర్ మంతర్ 2.0’ పేరిట ఉధృతమైన నిరసన కార్యక్రమాన్ని నిర్వహిస్తామని హెచ్చరించారు. ప్రస్తుత ఎన్నికల ప్రక్రియ పూర్తిగా తారుమారైందని, పౌరుల ప్రాథమిక ఓటు హక్కును వారి నుంచి దూరం చేస్తున్నారని అభిజీత్ దీప్తే ఈ సందర్భంగా తీవ్ర ఆరోపణలు గుప్పించారు.