గుంతల మయంగా డోన్ ప్రధాన రహదారి..!
పట్టించుకోని ఆర్ అండ్ బి అధికారులు – పాలకుల నిర్లక్ష్యం ప్రజలకు శాపం
వెల్దుర్తి, అక్టోబర్ 24 (అఖండ భూమి న్యూస్):
వెల్దుర్తి పట్టణంలోని ప్రధాన రహదారి డోన్ రైల్వే గేట్ నుండి తాసిల్దార్ కార్యాలయం మీదుగా హనుమాన్ జంక్షన్ వరకు, అలాగే పాత బస్టాండ్ నుండి రామలకోట బ్రిడ్జి వరకు గుంతలతో నిండిపోయి ప్రమాద రహదారిగా మారిపోయింది. వర్షాలు పడకపోయినా రహదారి గుంతలు వాహనదారుల ప్రాణాలకు ముప్పుగా మారగా, సంబంధిత ఆర్ అండ్ బి అధికారులు మాత్రం నిర్లక్ష్యంగా వ్యవహరిస్తున్నారు.
ప్రతిరోజూ వందలాది వాహనాలు, పాఠశాల పిల్లలు, ఉద్యోగులు ఈ మార్గంలో ప్రయాణం చేస్తుంటే రోడ్డు దుస్థితి ప్రజలలో తీవ్ర అసహనాన్ని రేకెత్తిస్తోంది. గుంతలలో చిక్కుకుని వాహనాలు దెబ్బతింటున్నా, ప్రయాణికులు పడే ఇబ్బందులు చూసినా అధికారులు చూసి చూడనట్టే ఉన్నారు. “ఈ పరిస్థితి ఎన్ని రోజుల పాటు?” అని ప్రజలు ప్రశ్నిస్తున్నారు.
స్థానికులు పత్రిక విలేఖర్లతో మాట్లాడుతూ..
> “ప్రతిరోజూ ఈ రహదారిపై ప్రమాదం తృటిలో తప్పుతుంది. కర్నూల్ వైపు వెళ్లాలంటే గుంతలతో పోరాడాల్సిందే. అధికారులు వస్తే రోడ్ పక్కనే తిరిగి వెళ్తారు, కానీ చర్యలు మాత్రం ఉండవు,” అని ఒక వాహనదారుడు ఆవేదన వ్యక్తం చేశాడు.
మరోవైపు పంచాయతీ అధికారులు, ప్రజా ప్రతినిధులు కూడా పరిస్థితిని పట్టించుకోకపోవడం ప్రజల్లో అసంతృప్తిని కలిగిస్తోంది. ఆర్ అండ్ బి శాఖ తక్షణం స్పందించి రహదారి మరమ్మతులు చేపట్టాలని, ప్రజా ప్రయాణానికి సౌలభ్యం కల్పించాలని ప్రజలు డిమాండ్ చేస్తున్నారు.
> “ఎన్నికల సమయంలో రోడ్లు బాగుచేస్తామంటారు, కానీ ఇప్పుడు మౌనం వహిస్తున్నారు. రోడ్డు కాదు, గుంతల సముద్రం అయిపోయింది” అని స్థానిక వ్యాపారులు వ్యాఖ్యానించారు.
ప్రజల ప్రాణాలు రోడ్డు గుంతల్లో కలిసే ముందు అధికారులు మేల్కొని చర్యలు తీసుకోవాలంటూ ప్రజలు విజ్ఞప్తి చేస్తున్నారు.
