వెల్దుర్తి ఎస్సైగా నరేష్ బాధ్యతలు స్వీకరణ
జర్నలిస్టులతో స్నేహపూర్వకంగా కలిసిన నూతన ఎస్సై
వెల్దుర్తి, నవంబర్ 1 (అఖండ భూమి న్యూస్): వెల్దుర్తి పోలీస్ స్టేషన్ నూతన సబ్ ఇన్స్పెక్టర్‌గా ఎం. నరేష్ శనివారం బాధ్యతలు స్వీకరించారు. గతంలో గూడూరు పోలీస్ స్టేషన్‌లో సత్ఫలితాలు సాధించిన అధికారి‌గా ఆయన పేరు గాంచారు. క్రమశిక్షణ, ప్రజాముఖ్య దృక్పథంతో పనిచేయడంలో నరేష్‌కు ప్రత్యేక గుర్తింపు ఉంది.
వెల్దుర్తిలో ఇప్పటి వరకు విధులు నిర్వహించిన ఎస్సై జి. అశోక్ సాధారణ బదిలీలో భాగంగా గూడూరు పోలీస్ స్టేషన్‌కు బదిలీ అయ్యారు. ఆయన వెల్దుర్తిలో సంవత్సరం మూడు నెలల కాలంలో శాంతి భద్రతల పరిరక్షణలో విశేష పాత్ర పోషించారు.
కొత్తగా బాధ్యతలు స్వీకరించిన ఎస్సై ఎం. నరేష్‌ను, బదిలీ అయిన ఎస్సై జి. అశోక్‌ను ఏపీయూడబ్ల్యూజే మండల అధ్యక్షులు ఎం. ఈశ్వరయ్య ఆధ్వర్యంలో జర్నలిస్టులు మర్యాదపూర్వకంగా కలుసుకున్నారు. ఈ సందర్భంగా నరేష్ మాట్లాడుతూ — “వెల్దుర్తి ప్రజల భద్రత, శాంతి కాపాడడమే నా ప్రధాన లక్ష్యం. జర్నలిస్టులతో సమన్వయం ఉంచుకుని పారదర్శకంగా పని చేస్తాను” అని తెలిపారు.
ఈ కార్యక్రమంలో జర్నలిస్టులు అమీర్, చంద్రశేఖరరావు, తాజ్ బాబా, రాజు, రాజశేఖర్, నజీర్, చిన్న, మారన్న, శేఖర్ తదితరులు పాల్గొన్నారు.
– అఖండ భూమి న్యూస్
